துபாய் அரசுக்கு இந்திய தொழிலதிபர்

துபாய் அரசுக்கு இந்திய தொழிலதிபர்
5 லட்சம் திர்ஹாம்கள் நன்கொடை
சனிக்கிழமை, செப்டம்பர் 7, 2007



துபாய்:

துபாய் சுகாதாரத் துறைக்கு இந்தியத் தொழிலதிபர் ஒருவர் 5 லட்சம் திர்ஹாம்களை நன்கொடையாக அளித்துள்ளார்.

துபாயில் உள்ள பிரபல நகைக் கடை ப்யூர் கோல்ட் ஜூவல்லர்ஸ். இந்த நிறுவனத்தின் தலைவராக இருப்பவர் பிரோஸ் மெர்ச்சன்ட். இவர் துபாய் அரசின் சுகாதாரத் துறையின் பல்வேறு மருத்துவத் திட்டங்களுக்கு நிதியுதவியாக, 5 லட்சம் திர்ஹாம் தொகையை நன்கொடையாக அளித்துள்ளார்.

இதற்கான காசோலையை அவர் துபாய் சுகாதாரத் துறை அமைச்சர் ஹூமைத் முகம்மது ஓபைத் அல் கத்தாமியிடம் வியாழக்கிழமை வழங்கினார்.

துபாய் குடிமக்களுக்கும், துபாயில் குடியேறியுள்ள வெளிநாட்டவர்களுக்கும் தேவையான மருத்துவத் திட்டங்களுக்கு உதவ இந்த நிதியுதவியை அளித்துள்ளதாக மெர்ச்சன்ட் தெரிவித்துள்ளார்.

நிகழ்ச்சியில் அமைச்சர் கத்தாமி கூறுகையில், சுகாதாரத் துறையின் மருத்துவத் திட்டங்களில் தனியாரையும் ஈடுபடுத்தும் முகமாகவே இதுபோன்ற நிதியுதவியை அரசு பெறுகிறது. துபாய் மக்கள் நல்ல சுகாதாரத்துடனும், நலத்துடனும் வாழ அரசுடன் கை கோர்த்து செயல்பட தனியாரும் முன் வர வேண்டியது அவசியமாகும் என்றார்.