நாக்பூரிலிருந்து துபாய்க்கு புதிய விமான சேவை

நாக்பூரிலிருந்து துபாய்க்கு புதிய விமான சேவை
வெள்ளிக்கிழமை, செப்டம்பர் 7, 2007


துபாய்:

நாக்பூரிலிருந்து துபாய்க்கு செப்டம்பர் 24ம் தேதி முதல் புதிய விமான சேவையை ஏர் இந்தியா எக்ஸ்பிரஸ் தொடங்குகிறது.

முதல் விமானம் நாக்பூரிலிருந்து 24ம் தேதி பிற்பகல் 1.30 மணிக்குக் கிளம்பும். துபாய்க்கு மாலை 6.25 மணிக்கு வந்து சேரும். செப்டம்பர் 26ம் தேதி முதல் முறைப்படியான விமான சேவை தொடங்கும். வாரம் மூன்று முறை இந்த விமான சேவை இயக்கப்படும்.

புதன், வெள்ளி மற்றும் ஞாயிற்றுக்கிழமைகளில் நாக்பூரிலிருந்து துபாய்க்கு விமான சேவை நடக்கும். துபாயிலிருந்து துபாய் நேரப்படி மாலை 3.50 மணிக்கு கிளம்பி இரவு 8.35 மணிக்கு நாக்பூரை வந்தடையும்.

மறு மார்க்கத்தில் நாக்பூரிலிரந்து பிற்பகல் 12.30 மணிக்குக் கிளம்பி துபாயை அந்நாட்டு நேரப்படி மாலை 3 மணிக்கு விமானம் சென்றடையும்.

துபாய் - நாக்பூர் சேவைக்கான அறிமுகக் கட்டணமாக 169 தினார் என நிர்ணயிக்கப்பட்டுள்ளது. வரிகள் தனி.

துபாய் மற்றும் ஷார்ஜாவிலிருந்து இந்தியாவின் 10 நகரங்களுக்கு ஏர் இந்தியா எக்ஸ்பிரஸ் நிறுவனம் வாரத்திற்கு 50 விமானங்களை இயக்குகிறது என்பது குறிப்பிடத்தக்கது